Штом ќе ја здогледаат градата, овие бебиња се возбудуваат, мавтаат со рачињата и ноџињата, и наизменично цицаат од едната и од другата града. Којзнае, можеби млекото од едната страна е повкусно отколку на другата?  Овие бебиња на овој начин покажуваат колку уживаат  додека цицаат. Меѓутоа треба да бидете сигурни дека возбудата на бебето додека се храни, не го нарушува неговиот  дневен ритам. Пробајте да го храните бебето во периодот кога ќе се разбуди, односно додека се уште лежи бидејќи тоа можеби малку ќе му го намали ентузијазмот и активноста Поради тоа што се возбудени, овие бебиња вообичаено голтаат многу воздух при цицањето, после тоа треба да се осигурате дека со држење на бебето во исправна положба, ги исфрлило сите гасови од стомачето.

Во деликатес како што е мајчиното млеко, не може да се ужива со брзање. Тоа е мотото на бебињата гурмани, на кои понекогаш им е потребно и двојно повеќе време за хранење отколку на другите бебиња. Бебињата гурмани цицаат бавно, редовно и не сакаат брзање – сакаат да бидат сигурни дека добиваат се што им е потребно додека се на града. Немојте да им го нарушувате уживањето! На вашето бебе му е потребно време за да си поигра со градата, да го вкуси малку млекото пред да почне со интензивно цицање при тоа испуштајќи секакви звуци на мљацкање и шмукање. При тоа, треба да имате во предвид дека на овие бебиња гурмани може лесно да им се одвлече вниманието. Место во кое има многу гласни луѓе не е добро место за доење на овие гурмани – само еден поглед на страна е доволен да прекинат со цицање. Кога го доите вашето бебе во јавност, можеби треба да го покриете преку главата со памучна прекривка. Сепак најдоброто решение за овие бебиња е да ги храните во удобноста и тишината на вашиот дом.

Доењето ги прави бебињата сонливи а посебно малите сонувачи. Тие сакаат малку да поцицаат, па малку да одморат, па повторно малку да поцицаат, па пак одмор...и тоа малку подолго трае. Малите сонувачи се релаксираат додека цицаат. Нив не им треба капење пред спиење бидејќи е доволно да ги ставите на града. Исто така, тие многу лесно заспиваат и кога ги доите во текот на ноќта. Бидете трпеливи и не ги прекинувајте овие бебиња во цицањето – само заради тоа што тие сакаат малку да одморат додека цицаат, не значи дека се нахранети. Пробајте да ги доите во исправена позиција бидејќи така ќе им биде потешко да заспијат. Кога вашето бебе ќе заврши со едната града, понудете му ја и другата. Пробајте со скокоткање на задната страна на вратот или на стапалцата како би се разбудило кога ќе задреме во тек на доењето, и бидете сигурни дека се нахранети со доволна количина на млеко.

Овие бебиња немаат волја за цицање во текот на првите денови и многу потешко ја прифаќаат градата. Поради ова, многу од  мајките се загрижени – но вистината е дека на овие одложувачи им треба малку повеќе време и не треба да ги брзате да почнат да цицаат. Кога самите ќе ја откријат градата, тие ќе се нахранат, ќе растат и ќе се развиваат исто како и останатите бебиња. Само им е потребна поголема поддршка за да пронајдат што е најдобро за нив.